Sunday, July 31, 2011

வாடகை கார்


ஒரு காலத்தில் கார்களை காண்பதே அபூர்வமாக இருக்கும்.  நான் சிறுவனாக  இருந்த போது எங்கள் தெருவிலேயே (10 வீதிகளை கொண்டது)  மொத்தம்  மூன்று பேரிடம் தான் கார் இருந்தது. ஒரு டாக்டர்(பீயட்) , எங்கள்  ஏரியாவின்  ஓனர்(அம்பசிடர்) மற்றும் ஜமீந்தார்(ப்ளைன் மூத்) ஒருவரிடம் மட்டும் தான்.

அது போல் டிராவல்ஸ் என்றெல்லாம் ஒன்றும் இருந்ததில்லை. ஒரே ஒரு டாக்சி ஸ்டாண்ட் மருத்துவ கல்லூரி அருகே இருக்கும். அதில் அதிகமாக இருப்பது, மஞ்சள் கருப்பு கலரில் உள்ள அம்பாசிடர் கார்கள் தான். அதை கண்டாலே எனக்கு  கிலியாகிவிடும். ஏனென்றால் அது பெரும்பாலும்  இறந்தவர்களை  எடுத்துக்கொண்டு  போவதற்கு தான் உபயோகிக்கப்படும்.   இப்போதெல்லாம்   காலம் மாறிவிட்டது. கார் இல்லாத வீடுகளையோ  டாக்ஸி  ஸ்டான்ட் இல்லாத ஏரியாவையோ பார்க்க முடிவதில்லை. சரி  விசயத்திற்கு  வருவோம்.  அமேரிக்கா போன்ற மேலை நாடுகளில் உள்ள  வசதிகளில்  மெடிக்கல்  இந்சூரன்சிற்கு பிறகு என்னை மிகவும் கவர்ந்தது  ரெண்டல் கார்  பாலிசி தான்.     

அமெரிக்காவில் ரெண்டல் கார் என்பது மிகவும் வசதியான ஒரு சேவை எனலாம்.  e -Enterprise, AVIS, hertz என பல கார்பரேட் நிறுவனங்கள் இந்த  சேவையை வழங்கி வருகின்றன. ஒரு மேஜர் கிரெடிட் கார்டு, உங்கள்  ஓட்டுனர் உரிமை இவை இரண்டும் இருந்தால் போதும். உங்களுக்கு  விருப்பமான காரை நீங்களே தேர்வு செய்து கொள்ளலாம். கட்டணம்  நீங்கள் தேர்வு செய்யும் காரைப்பொருத்தும், நாட்களைப்பொருத்தும்  இருக்கும். உதாரணமாக ஐந்து பேர் பயணம் செய்யக்கூடிய சாதாரண
ரக காருக்கு ஒரு நாளைக்கு 15 - 20 டாலர் கட்டணமாக வசூலிக்கப்படும்.  பெட்ரோல், இன்சூரன்ஸ் செலவு உங்களுடையது.

ரெண்டல் கார்கள் பொதுவாக புதிதாகவே இருக்கும். அதாவது ஓரிரு  வருடங்களுக்கு மேல் ஆன கார்களை ரெண்டல் கம்பெனிகளில் பார்ப்பது அரிது. அதே போல் மைலேஜும் 50 - 70 ஆயிரத்தை தாண்டி இருக்காது.  வண்டியை நீங்கள் வாடகைக்கு எடுக்கும் போது எப்படி கொடுக்கிறார்களோ  அதே போல் நீங்கள் திரும்பி கொடுக்க வேண்டும். உங்களை  வைத்துக்கொண்டே வண்டியை ஒரு முறை வலம் வந்து ஏதாவது ஸ்க்ராட்ச்  அல்லது நசுங்கல் இருந்தால் அதை குறித்து கொள்வார்கள், அதே போல் புல்  டான்க் பெட்ரோல் நிரப்பி கொடுப்பார்கள். நீங்கள் கொடுக்கும்  போது அதே போல் பெட்ரோலை நிரப்பி கொடுத்து விட வேண்டும்.

அமெரிக்காவில் வெளியூர் அல்லது வெகு தூரம் பயணிக்க வேண்டுமானால்  பெரும்பாலானவர்கள் வாடகை கார்களையே தேர்ந்தெடுப்பார்கள். இதற்கு  முக்கிய  காரணம் வாடகை கார்கள் புதியவைகளாக இருப்பதால் பயணத்தின் நடுவில் பெரும்பாலும் சிக்கல் ஏதும் ஏற்படாது. அப்படியே வந்தாலும் அதை  வாடகை கார் கம்பெனி பார்த்துக்கொள்ளும். அதே போல் இங்கு உங்கள் காரை  பிற்காலத்தில் விற்க வேண்டுமானால் எல்லோரும் கார் எவ்வளவு  மைலேஜ் போயிருக்கிறது என்பதை முக்கியமாக பார்ப்பார்கள். ஆகையால்  உங்கள் காரில் வெகு தூரம் செல்வதால் ஏற்படும் மைலேஜ் மற்றும்  தேய்மானத்தை கணக்கில் கொண்டால் அது நீங்கள் வாடகை கருக்கு செலவு  செய்வதை விட மேலாக இருக்கும். இதுவும் வாடகை காரை மிகவும்  விரும்பி எடுப்பதற்கு ஒரு காரணம். மற்றொன்று நீங்கள் விரும்பும் கார் மாடல்களை வாடகைக்கு எடுத்து நீங்களே ஒட்டி உங்கள் ஆசையை  பூர்த்தி  செய்து கொள்ளலாம்(வாடகை கார் என எந்த அடையாளமும்  வெளியில் இருக்காது).   

இம்மாதிரி வாடகை கார் வழிமுறைகள் இங்கு பெருமளவில் வெற்றி  பெற்றதற்கு இங்குள்ள பெரும்பாலான மக்களின் நேர்மையும் கடுமையான  சட்ட திட்டங்களும் ஒரு காரணம். வாடகை காரில் அந்த காரின்  மேனுவல்ஸ் (manuals) டூல்ஸ் உட்பட எல்லாம் அப்படியே லெதர் பாக்கில்  வைக்கப்பட்டிருந்தாலும் அதை யாரும் எடுத்து சென்று விட மாட்டார்கள். அதே போல் காரை நாமே ஒட்டுவதால் நம் குடும்பத்துடன் செல்லும்   போது  நமக்கும் ப்ரைவசியும் இருக்கும்.

தற்போது இந்தியாவிலும் முன்னே கூறியிருந்தது போல் மெடிகல் இன்சூரன்ஸ்  பிரபலமாகி வருகிறது. அதே போல் இம்மாதிரி வாடகை கார் கம்பெனிகளும்  வந்தால் சூப்பராக இருக்கும். ஹ்ம்ம் கனவு நினைவாகுமா?    

வாடகை சைக்கிள் பற்றிய என் முந்தைய பதிவு இங்கே...



share on:facebook

7 comments:

CS. Mohan Kumar said...

அமெரிக்கா போனாலும் இந்தியாவையே நினைப்பதால் தான் நீங்க ஆதி மனிதனா?

அமுதா கிருஷ்ணா said...

ராஜஸ்தானில் இந்த மாதிரி பைக்குகள் வாடகைக்கு எடுத்து இருக்கிறோம்.

கிருபாநந்தினி said...

எல்லாஞ் சரீங்ணா! அந்தந்தக் கார்களின் படங்களையே வலைப்பூவில் ஏத்தியிருந்தா, அதுக எப்பிடித்தான் இருக்குதுங்கன்னு தெரிஞ்சிட்டிருப்போம்ல?

முத்துலெட்சுமி/muthuletchumi said...

அந்த வசதியை விடுமுறையின் போது அனுபவித்துப்பார்த்தோம்.உண்மையில் அப்படி இந்தியாவில் வந்தால் அருமையாக இருக்கும்.விவரமாக எழுதி இருக்கிறீர்கள்.

ஆதி மனிதன் said...

@மோகன் குமார் said...
//அமெரிக்கா போனாலும் இந்தியாவையே நினைப்பதால் தான் நீங்க ஆதி மனிதனா? //

சொர்க்கமே என்றாலும் அது நம்மூரை போலாகுமா...மோகன் சார்?

ஆதி மனிதன் said...

@Amutha Krishna
//ராஜஸ்தானில் இந்த மாதிரி பைக்குகள் வாடகைக்கு எடுத்து இருக்கிறோம்.//

நன்றி அமுதா.
அப்ப எல்லா வகை பைக்குகளும் அங்கு கிடைக்குமா?

நன்றி முத்துலெட்சுமி

ஆதி மனிதன் said...

@கிருபாநந்தினி
//எல்லாஞ் சரீங்ணா! அந்தந்தக் கார்களின் படங்களையே வலைப்பூவில் ஏத்தியிருந்தா, அதுக எப்பிடித்தான் இருக்குதுங்கன்னு தெரிஞ்சிட்டிருப்போம்ல? //

எல்லா வகை கார்களும் கிடைக்கும். டொயோடா, ஹோண்டா முதல் ஹம்மர் வரை காசுக்கேத்த தோசை.

ஆமா, எப்படி இருக்கீங்க? அப்ப அப்ப வரீங்க. பின்னூட்டம் மட்டும் போட்டுவிட்டு போயிடுறீங்க. உங்க பிளாக் வந்தால் இன்னும் 2010 பழைய அப்டேட் தான் இருக்கிறது. திரும்பவும் எழுதுங்களேன். ப்ளீஸ்.

Post a Comment